Wlu Tʋ "bo cɛan ‑tie" 'de Dafi ‑pee ɛ
89
Etanɩ ‑wlʋa Esratɩ ɛ ɔɔ' 'dʋ ɔ blea.
2 'Ɩn 'je Tʋ "bo 'a 'diwɔnmɔa' 'tmʋ 'de blewlu 'di jeejee.
‑Wɛe 'ɩn 'je ɛɛ' wlu "kpei kpʋntɩ‑ 'tmʋ mamaʋ 'sʋ.
3 'De dɛ 'ɩn 'bɛɛa 'tmʋa,
ɛmɛ nɩ' ‑ma 'diwɔnmɔa' nɩ' jeejee.
‑Ma wlu "kpei kpʋan' "tiɛ 'e jaʋn 'di.
4 Dɛ ɛ 'tmʋa ɛ ka: ɛ 'na 'ɩn ‑tuɛ" dbɛɛdɛ
'de nyɔ 'ɩn ‑sa 'e mu ke 'ɩn 'nynɩ,
ɔmɔ ‑nɩ 'ma dbonʋɩ Dafi.
'Ɩn cɛn wlu ‑tie" 'de ɛɛ' ‑tɩ' 'ʋn.
5 'Ma muɛ nʋa' ‑ma Tʋ "bo 'je ‑kwle,
‑wɛe ‑ma 'beɔdɛ 'je nɩ ‑nɩnɩ. ‑Te' ‑kwlʋ.
6 'Oo Tʋ "bo, jaʋn a tmʋɛ dɩ 'dɔe ɛ nʋa' 'a ‑tɩ'.
Ɛɛ' "nynuu‑ ‑kwea i 'a 'tmʋ ɛɛ wlu "kpei kpʋn ‑tɩ 'mɛ.
7 Tʋ "bo, nyɔ ‑ke ɛ ‑kooɔ' "i 'de jaʋn di' ɛ?
‑Ɔ ‑ke ɛmɛ ‑kooɔ' "i 'de ‑Kɩɩ "klu ɛ.
8 Kea 'bleɛ faʋn', ɛ kmai",
ɛ nɩɛ dɛwɔn 'de ɛɛ' "sʋɩ ‑gbaea' 'dewei "klu.
9 'Oo Tʋ "bo, "sʋɩ ‑nɩa 'e jaʋn 'di 'a Kea,
nyɔ ‑kmai" ‑ɔ ‑sii ‑ʋn ɛ‑? ‑Mɔɔ' jei tu 'deɛ‑?
‑Ma wlu "kpei kpʋan' a jrɛ' i 'de ‑ʋn 'de i.
10 Kɩɩn, ‑mɔ due' koun ‑gbai' ‑sii 'tɔniɛ 'ɛ wɔn kmaa' wɔn.
‑Bo ɛɛ' 'plɩ sɔn 'ʋn ɛmɛ ‑ɛɛ jɩɩ ja.
11 ‑Mɔɔ "ikmasʋn ‑klɛɛ Esipʋ nyʋ i,
‑ɩn ‑gba' ‑ma tʋnyʋ 'ja 'de 'blʋa ‑wee'‑ "klein "kpei.
12 'blʋa ke jaʋn nɩɛ ɛɛ dɛ ‑o,
ɛmɛ ‑nʋ' 'kmʋ ke dɩ "klein ‑nɩɛ 'di ke‑
13 ‑Mɔ nʋ' 'jrʋ ‑kwea ke 'jrʋ ‑sɔn i ke‑.
Tabɔɔ crʋ ke Ɛɛmɔ crʋ nʋʋɛ ‑ʋn 'mʋa‑ i.
14 Ɛɛ' sʋn diɛ ‑kla, ɛɛ sʋn kuɛ 'e 'de i,
ɛɛ toɛ diian sʋn "jɛi.
15 "Isrɛa' ke dɛ "i ‑klɛɛa' ɩmɩ ‑nɩ
ɛɛ' Tʋ"bokpatɛ‑ 'ɛ ‑gban.
'Diwɔnmɔa' ke ɛɛ'
‑maa' poo wlufai ke ɩmɩ ɛɛ poo nya.
16 Nyʋ ‑bɛɛa' ‑ma 'nynɩ "i ‑mʋ ‑wi" nʋ 'mʋa‑.
Tʋ "bo, ʋʋ 'bɛɛ' ʋʋ 'je na 'de ‑ma ‑sɔn ʋn.
17 Dɛ ɛ nɩa ʋʋa' Kea ɛɛ muɛ ʋʋa' 'mʋa‑ 'blea',
'de ɛɛ' "isrɛa' 'ʋn mɔ ʋʋa mu "jru "jɛi kpaa'.
18 Dɛ ‑nʋɛ ɛmɛ ‑ɛɛ ‑nyɩ" ‑a 'kpɩ,
'de ɛɛ' 'saaʋn mɔ ‑aa kpa tʋ 'a "jru.
19 Tʋ "bo mɛ ‑ɛɛ fuo ‑a i,
‑aa 'beɔ nɩɛ 'e Israɛ 'ɛ Tʋ "bo ‑kwea i 'kwa.
20 See 'de ɛ ‑sa ɛɛ' ‑cɛ" 'kwla
‑wɛe ɛɛ wlu de ɛɛ' ‑tɩ kmai" ‑pee;
ɛ 'na 'ɩn ‑teɛ' ‑kla dii kwa wɛi
'ɩn ‑sa nyiɔ ‑tɔo due' 'de 'cɛ "klu.
21 'Ɩn 'jeɛ Dafi 'ma dbonʋɩ
ɔmɔ 'ɩn po 'ma 'cna ‑kweai "jru.
22 ‑Ma muɔ sʋn o poa' ‑wɛe ‑ɩn 'jeɔ 'kpɩ "nyɩ.
23 Ɔɔ' tʋnyɔ seɔ "jru ‑tiie' i,
‑wɛe 'diwɔnynii seɔ "kpei 'nyɛ i.
24 'Ma muɛ ɔɔ' "cɛi o nʋʋ bʋ ‑sɔn i sʋʋan' 'de ɔ "juɛi,
‑wɛe 'ɩn je nyʋ ‑a ‑nyɩɛ ɔ 'ʋn sʋn ‑pʋn" kpa.
25 'Ma ‑maa' poo wlu fai" ke
'ma 'diwɔnmɔa' ke ɩa muɛ ɔ o sia'
‑wɛe ‑tɩn' se ɔ "i 'dbaa i.
26 "Ni ‑gbii ke tɔniɛ ke ɔɔ'
'beɔdɛ ɛ mʋɩ ‑wee'‑ "jru i ‑siia'.
27 ‑Bo ɔɔ sea 'ʋn ‑gbɛɛ'‑, ka ɔ 'jea 'da 'ka ka:
‑mɔ ‑nɩ 'ɩn "bo, kɩɩn, ‑mɔ ‑nɩ 'ma Kea,
'ma ‑kliosou" ‑ɛɛ ‑pʋʋa' 'ʋn ɛ.
28 'De 'mɔ ɛ 'ma muɔ 'ma "i ‑saaju 'ʋn nʋa',
ɔɔ' 'nynɩ 'wlʋa 'e 'beɔ ‑wee'‑ "klein "jru 'ja.
29 'Ma muɔ 'saaʋn "jrii nʋa jeejee,
‑wɛe dbɛɛdɛ ‑nɩa 'de ɔ ke 'ʋn 'nynɩ se fai" poo i.
30 'Ma muɛ nʋa' ɔɔ' "ji se i sɔn i,
‑wɛe ɔɔ' Tʋ"bokpatɛ‑ 'e ‑sisi' nɩ ka jaʋn nɩa.
31 ‑Bo ɔɔ' "nynuu‑ 'bɔ 'ma kɛ',
'de ‑bo ʋʋ se na ka 'ɩn "siia 'nynɩ ɛ,
32 ‑bo ʋʋ ‑saa 'ma kɛ', 'de ‑bo ʋʋ sɩ wɔn 'jeɛ,
33 'ma muɛ ʋʋpʋ‑ "sɩɩɛn 'ʋn kpaa'
'de 'ma kɛ' ʋʋpʋ‑ ‑saa' ɛɛ' ‑tɩ' 'ʋn.
34 'Kaa' 'ɩn se 'ma 'diwɔnmɔa' ‑mɛ ɔ 'kwa ‑sai.
'De 'ɩn se 'ma wlu fai" pooi 'de ɔ ‑pee.
35 'Ɩn‑, 'ɩn se 'ma dbɛɛdɛ ‑kwlin ‑saai mamaʋ
‑wɛe 'ɩn se dɛ ‑wlʋa 'de 'ʋn 'wɔn fai" poo i.
36 'Ɩn cɛn wlu ‑tie" 'de 'ma i ‑kwɛa' 'a ‑tɩ' 'ʋn,
''ɩɩn‑, 'ɩn se Dafi 'srɛ i poo i.
37 Ɔɔ' "ji a muɛ nɩa' jeejee;
ɔɔ' tʋ Tʋ"bokpatɛ‑ ɛ muɛ
'de 'ʋn "juɛi nɩa' ka 'jrʋ nɩa.
38 Ka 'cʋ sea i sɔn‑ ‑ta 'bleɛ
'ka ɔɔ mu ‑kwlea' mamaʋ.
‑Tɩ' 'a ‑ta 'jei ‑nɩa 'e jaʋn 'di 'a poo wlu fai". ‑Te' ‑kwlʋ.
39 'De 'kamɔ ‑ma ‑fuun ɔ nya i,
‑ɩn to nyɔ ‑ɩn poa ‑ma 'cna ‑kweai "jru 'kpʋ "i,
‑wɛe ‑ma 'kpaa ɔ 'cɛn i.
40 Dbɛɛdɛ ɛ poa 'de ɛ ke
ɛɛ' dbonʋɩ 'nynɩɛ ɛ toɛ 'kpʋ "i;
ɛ ‑sa ɔ Tʋ "bo fan "jru ɛ ‑sɛ ‑gban'.
41 Ɛ 'wla ɔɔ' blo' ‑wee'‑ "klein,
ɛ ‑gba' ɔɔ' "jru 'wlaa na' ‑wee'‑ "jɛi.
42 Nyʋ ʋʋa ‑sia' ‑wee'‑ a 'tɛn ɔɔ' dɩ 'mɛ;
ɔmɔ nɩɛ ɔ "dɛi ‑wi" 'a 'nynɩɛ ‑tɩ.
43 Ɛ kpa ɔɔ' tʋnyʋ 'a "ikmaa' "jɛi,
‑wɛe ɔɔ' tʋnyʋ ‑wee'‑ nɩ 'e 'mʋa‑ 'ʋn.
44 Ɛ "biiɛ ɔɔ' ‑placnɛ 'de ɔɔ' ‑cɛ" ‑pee,
‑wɛe ɛ seɔ kwa 'dewei ‑te 'de tʋ 'ʋn.
45 Ɛ nynaa ɔɔ' 'nynɩ 'wlʋa i,
ɛ ‑sɔɔ 'beɔ kpatɛ ‑sɔn;
46 Ɛ kpʋn ɔɔ' 'wɩ 'mlain",
‑wɛe ɛ 'dbɔɔ ‑tɩn' "i. ‑Te' ‑kwlʋ.
47 Blaa nɔ", Tʋ "bo? Ɛ 'je ɛɛ' ‑cɛ" 'kwla ‑tu" ‑tɩ 'bɔ ɛ.
‑Wɛe ɛɛ' 'cɛn 'e jrɛjrɛ nʋ ka nɛ ‑gbauo nɩa?
48 Ɛ po ‑tɩ' ‑kwlʋ o:
'ma 'wɩ se "i tɛn, ɛ 'bɛɛ ɛ nyiɔ nʋ "jɛi?
49 Nyɔ ‑bɛɛ' ‑ɔ ‑e 'kmʋ nɩ ‑wɛe ‑ɔ se 'mɛ i ɛ?
'De nyɔ ‑bɛɛ' ɔɔ' 'wɩ 'de 'mɛʋn o ‑kwlɔ ‑saa' a‑? ‑Te' ‑kwlʋ
50 Tʋ "bo, ‑ta ɛɛ' 'diwɔnmɔa' ‑ɛ ‑saai" ‑mɛ nɩɛ?
'De dɩ ‑ɩa wlu ɛ 'cɛan ‑tie" 'de wlu "kpei kpʋn 'a 'ʋn
'de Dafi ‑pee ‑mɩ 'deɛ‑?
51 Tʋ "bo ɛ po ‑tɩ' ‑kwlʋ o 'de
ɛɛ' "nynuu‑ ‑tɩn' 'dbaa "i 'a ‑tɩ' 'ʋn,
'de nyʋ ‑tia ka ‑ʋʋa ‑tɩ' nɩa 'ʋn "jru
ɛ naa ʋʋa' ‑tɩ' tɔ' "kpei.
52 Ka ɛɛ' tʋnyʋ toɛ wɔn o ɛ,
ɛ po ‑mɛɛ' ‑tɩ' ‑kwlʋ o Tʋ "bo
"ju ‑ɩn ‑sa 'o ‑ɩn poa 'cna "jru mɔ ʋʋa ‑tu" 'kle.
53 "Diwan kpʋn Tʋ "bo Kea
'de nɔ" "o nɔ" ‑wee'‑ 'di 'kamɔ ɛ nɩ‑!
Kɩɩn, 'kɩ 'je nɩ‑.